أكد الإعلامي عمرو أديب أن إدارة الرئيس الأمريكي المنتخب دونالد ترامب لديها رؤية مشابهة تماما لرؤية الحكومة الإسرائيلية الحالية بشأن القضية الفلسطينية.
وقال أديب خلال برنامج "الحكاية" المذاع على قناة "إم بي سي مصر": "عندي رسالة لكل الناس اللي كانوا في انتظار الرئيس دونالد ترامب وأنا مبتكلمش في أي أسرار إنما عندي لحضراتكم معلومة عشان تريح نفسك من بدري لأن كان في ناس لسة في حالة الدهشة أنه الوضع هيبقي أسوأ".
وأضاف: "الراجل اللي الرئيس ترامب اختاره أنه يبقى سفير أمريكا في إسرائيل كانت تصريحاته كالآتي تلات جمل الجملة الأولى إيه حكاية الدولتين دول مفيش حاجة اسمها حل الدولتين وقال الرئيس ترامب مش بتاع حل الدولتين ومن الأول بيسك على المطلوب".
وتابع: "اتنين قال أغرب تصريح ممكن تتخيله من بداية القضية دي قال إنه يا جماعة الناس المحتلة للأرض دي اللي هو يقصد الإسرائيليين ليهم صك شرعي فيها من 3 آلاف سنة دا الراجل ده موجود هناك من 3 آلاف سنة هنيجي دلوقت نقوله امشي".
وواصل: "نمرة تلاته بنتكلم عن موضوع بسيط جدا الناس كلها تقعد مع بعض في حتة واحدة ويتصرفوا يعني بسم الله الرحمن الرحيم الإجابة إسرائيل".
وأوضح: "الأمر شبه نهائي وناس كتير هتقولي دا موقف في الأول هو مش محتاج موقف في الأول غالبية اليهود ادوا للديمقراطيين ومبيردش حاجة لحد هما باعتين نتنياهو أمريكاني يقعد مع نتنياهو الإسرائيلي قالهم مفيش حاجة اسمها الضفة الغربية في حاجة اسمها إسرائيل ومفيش حاجة اسمها فلسطين".
وأكمل: "الراجل ده رأيه كده من عشرين سنة ومفيش الضفة الغربية والكلام الفارغ بتاعكم ده ولا حماس ولا فتح في إغلاق والأربع سنين اللي جايين دول بالنسبة للقضية المحورية بالنسبالنا، كل ده الراجل من الأول في دماغه والناس أمينة جدا من الأول قالك أنا جاي عشان حل الدولة الواحدة".
واختتم: "ما يحدث في واشنطن يبقى في واشنطن أنت هتعمل ايه؟ أنت عايز تعمل ايه؟ لو عايز تعمل حاجة لازم تفهم أن العمل في واشنطن من الآن مهم يعني لازم يبقي عندك ناس موجودة هناك كل أسبوع لأنه الإسرائيلي جاتله فرصة وهو مخلص غزة دي عبء عليه مش عايزيها والإسرائيلي عايز الحل التاريخي القانوني اللي محدش يجي يقوله بعد كده أنت ايه اللي مقعدك هنا".
0 تعليق